Gríman - Íslensku sviðslistaverðlaunin 2016

Tilnefningar kynntar 30. maí nk.

19. maí 2016

grimanlogo2011

Tilnefningar til Grímunnar - íslensku sviðslistaverðlaunanna verða kynntar mánudaginn 30. maí nk. við hátíðlega athöfn í Þjóðleikhússkjallaranum kl 16:15 og er athöfnin öllum opin.

65 verk voru skráð í Grímuna leikárið 2015-2016, þar af 35 sviðsverk, 16 dansverk, 7 barnaverk og 7 útvarpsverk.

Kosið er í 19 verðlaunaflokkum sem eru eftirfarandi:

Sýning ársins, leikrit ársins, leikstjóri ársins, leikari ársins í aðalhlutverki, leikkona ársins í aðalhlutverki, leikari ársins í aukahlutverki, leikkona ársins í aukahlutverki, leikmynd ársins, búningar ársins, lýsing ársins, tónlist ársins, hljóðmynd ársins, söngvari ársins, dans- og sviðshreyfingar ársins sem er nýr flokkur, dansari ársins, danshöfundur ársins, barnasýning ársins, útvarpsverk ársins og sproti ársins.

Að auki eru árlega veitt heiðursverðlaun Sviðslistasambands Íslands. Heiðursverðlaunin eru veitt einum einstaklingi er þykir hafa skilað framúrskarandi ævistarfi í þágu sviðslista á Íslandi.

Fjórar valnefndir starfa árið um kring á vegum Grímunnar, valnefnd sviðsverka, valnefnd dansverka, valnefnd barnaverka og valnefnd útvarpsverka. Nefndirnar velja 5 einstaklinga eða verk í hverjum verðlaunaflokki í forvali Grímunnar er hljóta tilnefningu. Í aðalvali velja nefndir sigurvegara í hverjum flokki og verða verðlaunin veitt við hátíðlega athöfn í Þjóðleikhúsinu þann 13. júní nk, einnig verður hátíðin í beinni útsendingu á Rúv.

Fleiri fréttir